અમદાવાદ શહેરમાં ફરી એક વખત લાખો રૂપિયાની લૂટથી ચકચાર મચી ગઈ છે. કર્ણાવતી ક્લબની સામે આ ચકચારી લૂટની ઘટના બની છે. કલ્બની સામે આવેલા રોડ પર પસાર થઈ રહેલી ઈનોવા કારમાંથી 40 લાખ રૂપિયા ભરેલી બેગ લઈને લૂટારુઓ ફરાર થઈ જતા પોલીસ દોડતી થઈ ગઈ છે.
કારના ટાયરમાં પંચર હોવાનું કહી લૂટ
સામે આવેલી વિગતો પ્રમાણે આંગડિયા પેઢીમાંથી એક કોન્ટ્રાક્ટર રૂપિયા લઈને ઈનોવા કારમાં જઈ રહ્યો હતો. તે કર્ણાવતી ક્લબ સામેના રોડ પર પહોંચ્યો એ દરમિયાન તેની કાર પાસે વાહન લઈને આવેલા બે શખ્સોએ તેની કાર અટકાવીને કારના ટાયરમાં પંચર હોવાનું કહ્યું.લૂટારુઓની ચાલાકી ન સમજી શકનાર કોન્ટ્રાક્ટર નીચે કારમાંથી નીચે ઉતરીને ટાયર જોવા ગયો. એટલી વારમાં કારમાં પડેલો રૂપિયા ભરેલો થેલો લઈને બંને શખ્સો પલાયન થઈ ગયા. ઘટના અંગે જાણ થતાં ઉચ્ચ અધિકારીઓ ઘટનાસ્થળે દોડી આવ્યા અને લૂટારુઓને પકડવા કાર્યવાહી શરૂ કરી છે.
CCTV કેમેરાના ફૂટેજ મેળવવા તજવીજ
કર્ણાવતી ક્લબની સામેની બાજુથી સેટેલાઈટ તરફ જતા રસ્તા પર લૂટનો આ બનાવ બન્યો. ઘટનાસ્થળે પહોંચેલી પોલીસ દ્વારા લૂંટ મામલે તપાસ હાથ ધરવામાં આવી છે. આસપાસના વિસ્તારમાં CCTV કેમેરાના ફૂટેજ મેળવવા માટે પણ તજવીજ હાથ ધરવામાં આવી છે.
આનંદનગર પોલીસ સ્ટેશન વિસ્તારમાં બની ઘટના
લૂટની આ ઘટના આનંદનગર પોલીસ સ્ટેશન વિસ્તારમાં બની છે. જો કે લાખોની લૂટ હોય ઝોન-7ના DCP પણ ઘટનાસ્થળે પહોંચ્યા હતા અને લૂટ અંગે તપાસ હાથ ધરી હતી. આંગડિયા પેઢી નજીકથી જ લૂટારુઓ રૂપિયા લઈને નીકળેલા કોન્ટ્રાક્ટરનો પીછો કરી રહ્યા હોવાની આશંકા છે.